ഒരു കാലത്ത് നമുക്ക് എത്രയും വേണ്ടപ്പെട്ട ഒരാൾ. എപ്പോഴോ പിരിഞ്ഞു പോയ, മനസ്സിൽ ഒരു ഓർമയായി മാത്രം അവശേഷിക്കുന്ന ഒരാൾ..
ഏതോ ജന്മ കൽപനയിൽ...
ഈ പാട്ട് കേൾക്കുമ്പോൾ അയാൾ മനസ്സിലേക്ക് തിരികെ വരും. ഇനി എന്നെങ്കിലും, ഏതെങ്കിലും ഒരു ജന്മത്തിൽ, അയാളോടൊപ്പം പണ്ടെപ്പോഴോ ആസ്വദിച്ച നിമിഷങ്ങളിലേക്ക് ഒരിക്കൽ കൂടി പോകാൻ കഴിഞ്ഞെങ്കിൽ എന്ന് ആഗ്രഹിക്കും. ഒരിക്കലും അത് സംഭവിക്കില്ലെന്ന് അറിയാവുന്നത് കൊണ്ട് അത് ഏറ്റവും ഹൃദ്യമായി അനുഭവപ്പെടും.
പ്രണയാതുരമായ ഈ പാട്ടിൻ്റെ വരികൾ എഴുതുമ്പോൾ പൂവച്ചൽ ഖാദർ ആ ഓർമ്മകളിലൂടെ കടന്നു പോയിട്ടുണ്ടാകും. അത് മനസ്സിലേക്ക് എടുത്ത് പാട്ടിന് ശബ്ദം നൽകിയപ്പോൾ വാണി ജയറാം അത് അനുഭവിച്ചിട്ടുണ്ടാകും.
തമ്മിൽ ചൊല്ലാതെ വിങ്ങും ഓരോ വാക്കും കണ്ണിൽ.... നിൽക്കാതെ കൊള്ളും ഓരോ നോക്കും ഇടയുന്നു
നാം ഒഴുകുന്നു... നിഴൽ തീർക്കും ദ്വീപിൽ
പ്രണയത്തിന്റെ നോവും നൊമ്പരവും സുഖവും കണ്ണുകളിലൂടെ അറിയാത്ത ആരാണ് ഉണ്ടാകുക. ഇഷ്ടപ്പെട്ട പെൺകുട്ടിയെ കാണുമ്പോൾ വാക്കുകൾ തൊണ്ടയിൽ കുരുങ്ങാത്ത ഏത് കാമുകനാണ് ഉണ്ടാകുക.
പ്രണയം ഏറ്റവും മനോഹരമായിരിക്കുന്നത് നമ്മുടെ സങ്കൽപ്പങ്ങളിലാണ് എന്ന് എവിടെയോ വായിച്ചത് ഓർക്കുന്നു. ഇതുപോലുള്ള പാട്ടുകൾ ആ ഭാവനകൾക്ക് ജീവൻ നൽകുന്നു.
അനശ്വര ഗായിക ഈ ലോകം വിട്ട് പോയെങ്കിലും ഗാനങ്ങളിലൂടെ അവരുടെ ശബ്ദം നമ്മളെ ആനന്ദിപ്പിച്ചു കൊണ്ടിരിക്കും എക്കാലവും.
ആദരാഞ്ജലികൾ
