ഇഷ്ടങ്ങൾ

എന്റെ ജീവിതം എന്റെ മാത്രം ജീവിതമാണ്. അതിലെ ഓരോ നിമിഷവും എന്റെ സംതൃപ്തിക്കും സന്തോഷത്തിനും വേണ്ടിയാണ് ചിലവഴിക്കേണ്ടത്. അങ്ങിനെയല്ലാത്ത സമയങ്ങൾ ഉണ്ടെങ്കിൽ അത് ഭാവിയിൽ അങ്ങിനെയുള്ള സമയങ്ങൾ ഉണ്ടാക്കുന്നതിന് വേണ്ടിയാകണം ഉപയോഗിക്കേണ്ടത്.

ഇങ്ങിനെ ജീവിക്കുന്നതിൽ ഒരു ത്രിൽ ഇല്ല .. എനിക്ക് കാട്ടിൽ പോകണം രാത്രിയിൽ മഴയത്തു ഏറു മാടത്തിൽ കിടന്നു കാടിന്റെ ശബ്ദവും കേട്ട് ഉറങ്ങണം.. കാലത്തു സൂര്യരശ്മികൾ മുഖത്ത് വീഴുമ്പോൾ എണീക്കണം. അടുത്തുള്ള അരുവിയിൽ പോയി നീന്തിക്കുളിക്കണം. പുഴയുടെ തീരത്തു വെളുത്ത മണലിൽ  വെയിൽ കാഞ്ഞു അല്പനേരം വിശ്രമിക്കണം.

ഹാ സൂപ്പർ ആയിരിക്കും. കേട്ടവരൊക്കെ പറഞ്ഞു.

ഞാൻ ആലോചിച്ചു. ഇത്രയുമൊന്നും എത്തിയില്ലെങ്കിലും കുറെയൊക്കെ നേരിട്ട് അനുഭവിച്ചിട്ടുണ്ട്. അത്  അഗസ്ത്യാർകൂടം പോയപ്പോഴാണ്. മൂന്ന് തവണ അവിടെ പോയിട്ടുണ്ട്. ഒരിക്കൽ മഴ സമയം ആയിരുന്നു. മഴയത്തു കാട് ‌ കേറിയാൽ കാലിലും കയ്യിലും ചിലപ്പോൾ  മുഖത്തുവരെ കുളയട്ടകൾ പാഞ്ഞു കേറും. രക്തം കുടിക്കുന്നത് പോട്ടെന്ന് വെയ്ക്കാം കൊതുകും രക്തം കുടിക്കുന്നുണ്ടല്ലോ പക്ഷെ അവ ഉണ്ടാക്കുന്ന ഒരു അറപ്പ് അത് യാത്രയുടെ സൗന്ദര്യം കളയും. അത് ആലോചിച്ചു ടെൻഷൻ അടിക്കാനേ പിന്നെ സമയം കാണുകയുള്ളൂ . പിന്നെ ഏറു മാടത്തിൽ ഒന്നും അല്ലെങ്കിലും നാല് വശവും ഓലയും ടാർപോളിനും ഒക്കെ കൊണ്ട് മൂടിയ ഒരു ചെറിയ മാടത്തിൽ രാത്രി കഴിഞ്ഞിട്ടുണ്ട്. 

വീശിയടിക്കുന്ന കാറ്റും തുളച്ചു കേറുന്ന തണുപ്പും ആദ്യം രസമാണ് കൗതുകമാണ് പക്ഷെ പിന്നീട് അത് നമ്മുടെ ഉറക്കം നശിപ്പിക്കുമ്പോൾ ശല്യമാകും. എങ്ങിനെയെങ്കിലും രാത്രി തീർന്നു കിട്ടിയിരുന്നെങ്കിലെന്നു തോന്നിപ്പോകും. കാട്ടിലെ അരുവിയിലെ കണ്ണീരു പോലുള്ള തണുത്ത വെള്ളത്തിൽ കുളിച്ചിട്ടുണ്ട്. കുളിക്കുന്ന സമയത്തു മൂർഖനെക്കണ്ടു ഇടയ്ക്കു വെച്ച് നിർത്തി കേറിപ്പോന്ന സന്ദർഭങ്ങളും ഉണ്ടായിട്ടുണ്ട്.

ജീവിതത്തിൽ പലതിനോടും ഇഷ്ടം തോന്നാം. പലതും ചെയ്യണമെന്ന് ആഗ്രഹിക്കാം എന്നാൽ അവ നേടുമ്പോൾ അതിന് കൊടുക്കേണ്ടിവരുന്ന ഒരു വിലയുണ്ട് അത് എത്രമാത്രം ആണെന്ന് മുൻപേ മനസ്സിലാക്കാൻ ശ്രമിക്കുക. ചിലപ്പോൾ നമ്മൾ അതിനേക്കാൾ കൂടുതൽ ഇഷ്ടപ്പെടുന്ന, ആഗ്രഹിക്കുന്ന ചിലത് അതിന് വിലയായി കൊടുക്കേണ്ടി വന്നേക്കാം.