എന്താണ് ബലാത്സംഗം

ബലാത്സംഗം എന്നു കേട്ടാൽ എന്റെ മനസ്സിൽ ഓടി വന്നിരുന്ന ചിത്രം ഒരു സ്ത്രീയെ ഒരു പുരുഷൻ  ബലം പ്രയോഗിച്ചു ലൈംഗിക ബന്ധത്തിന്  ശ്രമിക്കുന്നതാണ്. നാം കണ്ട സിനിമകളിൽ ബാലൻ കെ നായരും, ജോസ് പ്രകാശും ഉമ്മറുമൊക്കെ ചെയ്തിരുന്നത് അതായിരുന്നു. ഒട്ടുമിക്ക ആൾക്കാരുടെയും മനസ്സിൽ ഇപ്പോഴും അതിനെക്കുറിച്ചു ഇതുപോലെ ഒരു ചിത്രം തന്നെയായിരിക്കുമെന്ന് തോന്നുന്നു. അതുകൊണ്ടാണ് വിജയ് ബാബുമാരെ വെള്ള പൂശാൻ ഇത്ര ആവേശം കാണിക്കുന്നത്.   

എന്നാൽ ഇന്ത്യൻ പീനൽ കോഡ് അനുസരിച്ചു ബലാൽസംഗത്തിന് മേൽപ്പറഞ്ഞത് മാത്രമല്ല നിർവചനം. ഒരു സ്ത്രീ ജോലി ചെയ്യുന്ന സ്ഥാപനത്തിലെ മേധാവി/ മേൽ ഉദ്യോഗസ്ഥൻ ആ സ്ത്രീക്ക് സ്ഥാനക്കയറ്റം നൽകാം എന്നു വാഗ്ദാനം നൽകി അവളുമായി ലൈംഗിക ബന്ധത്തിൽ ഏർപ്പെടുന്നതും, അവളെ ജോലിയിൽ നിന്ന് പിരിച്ചുവിടും എന്നു ഭീക്ഷണിപ്പെടുത്തി ലൈംഗിക ബന്ധത്തിൽ ഏർപ്പെടുന്നതും, മാനസിക രോഗിയായ പെണ്കുട്ടിയെ ലൈംഗികമായി ഉപയോഗിക്കുന്നതും, 18 വയസ്സു തികയാത്ത പെണ്കുട്ടിയുമായി  ഒരു പുരുഷൻ/ ആണ്കുട്ടി അവളുടെ സമ്മതത്തോടെയോ അല്ലാതെയോ ലൈംഗിക ബന്ധത്തിൽ ഏർപ്പെടുന്നതും, വിവാഹം കഴിക്കാം എന്നു വാഗ്ദാനം നൽകി വർഷങ്ങളോളം ലൈംഗിക ബന്ധത്തിൽ ഏർപ്പെടുകയും ഒടുവിൽ അതിൽ നിന്ന് പിന്മാറുന്നതും എന്നു വേണ്ട സ്ത്രീയുടെ സമ്മത്തോടെ ആണെങ്കിൽ കൂടിയും അവളെ തെറ്റിദ്ധരിപ്പിച്ചാണ് ആ സമ്മതം നേടിയിട്ടുള്ളതെങ്കിൽ അതും ബലാത്സംഗത്തിന്റെ നിർവചനത്തിൽ വരും.

നമ്മുടെ സദാചാര ബോധത്തിന് ബലാൽസംഗം എന്നു തോന്നാത്ത പലതും ബലാൽസംഗം ആണെന്ന് സാരം. അഞ്ചു വർഷമായി തന്നെ ശാരീരികമായി പീഡിപ്പിക്കുന്ന പുരുഷനെതിരെ സ്ത്രീ പരാതി നൽകി എന്നൊക്കെ വാർത്ത വായിക്കുമ്പോൾ ഇതെങ്ങനെ പീഡനമാകും? അഞ്ചു വർഷം ആയിട്ടും പരാതി നൽകാത്തത് എന്ത്? എന്നൊക്കെ മനസ്സിൽ തോന്നുന്നെങ്കിൽ മേൽപ്പറഞ്ഞതൊക്കെ ഒന്ന് പരിഗണിക്കുക. നിയമത്തിന് മുൻപിൽ അതും ബലാൽസംഗമാണ്. ഇതിനെപ്പറ്റി അറിവില്ലാത്തത് കൊണ്ട്  പരാതി കൊടുക്കാത്തവരുമുണ്ട് ഇത് ദുരുപയോഗം ചെയ്ത് കുടുക്കുന്നവരുമുണ്ട്. 

പിന്നെ ബലാൽസംഗം ചെയ്യപ്പെട്ടിട്ടില്ലാത്ത നമ്മൾ പുരുഷന്മാർ അറിഞ്ഞിരിക്കേണ്ട ഒരു കാര്യമുണ്ട്. ലൈംഗിക അതിക്രമങ്ങൾക്കെതിരെ പ്രതികരിക്കുക സ്ത്രീകൾക്ക് അത്ര എളുപ്പമുള്ള കാര്യമല്ല.  കയ്യിലെ പേഴ്‌സ് ഒരാൾ മോഷ്ടിച്ചാൽ പോലീസിൽ പരാതി കൊടുക്കുന്ന ലാഘവത്തോടെ ലൈംഗിക അതിക്രമത്തിന് കേസ് കൊടുക്കാൻ തക്ക മനോബലമൊന്നും നമ്മുടെ സമൂഹത്തിലെ സ്ത്രീകൾക്ക് ഇതുവരെ ഉണ്ടായിട്ടില്ല. ഉണ്ടാകുന്ന നൂറ് അതിക്രമങ്ങളിൽ ഇരുപതിൽ താഴെ മാത്രമേ റിപ്പോർട്ട് ചെയ്യപ്പെടുന്നുള്ളൂ. കാരണം എന്തെന്ന് പറയണ്ടല്ലോ റിപ്പോർട്ട് ചെയ്തവരെ സമൂഹം എടുത്തിട്ട് പെരുമാറുന്നത് നമ്മൾ കാണുന്നതല്ലേ. അത് തന്നെയാണ് പ്രതികൾക്ക് ഇതിനുള്ള ധൈര്യം കൊടുക്കുന്നതും.